खंडाळा : तालुक्यातील पारगाव शिवारात बांधण्यात येणाऱ्या नवीन बंधाऱ्यामुळे शेतकऱ्यांना मोठा दिलासा मिळणार आहे. या बंधाऱ्यामुळे पाणी साठ्याची समस्या कमी होऊन शेतीला पूरक पाणीपुरवठा होईल, असा विश्वास पारगावचे सरपंच अनिल रिठे-पाटील यांनी व्यक्त केला.
पारगाव येथील पवार मळा परिसरात जिल्हा नियोजन मंडळाच्या माध्यमातून सुमारे 26 लाख रुपये खर्चाच्या बंधाऱ्याच्या कामाला मंजुरी मिळाली आहे. या बंधाऱ्याचे भूमिपूजन नुकतेच पारगावचे सरपंच अनिल रिठे-पाटील यांच्या हस्ते श्रीफळ वाढवून करण्यात आले. या उपक्रमामुळे परिसरातील शेतकऱ्यांना शेतीसाठी पाणी उपलब्ध होईल तसेच रब्बी हंगामाच्या पिकांवर होणारा परिणाम कमी होईल.
सरपंच अनिल रिठे-पाटील यांनी या वेळी बोलताना सांगितले की, “या बंधाऱ्यामुळे पाणीटंचाईची समस्या दूर होईल आणि पाण्याचा साठा वाढून शेतीचे उत्पादनही वाढेल. शेतकऱ्यांची समृद्धी हीच गावाच्या प्रगतीची खरी ओळख आहे, आणि त्यामुळे अशा पायाभूत सुविधा निर्माण करण्यावर आम्ही प्राधान्य देत आहोत.”
या कार्यक्रमाला अनेक मान्यवर उपस्थित होते. यामध्ये पत्रकार निलेश गायकवाड, सचिन मोटे, किशोर यादव, विजय भणगे, डी. टी. कदम, रुपेश गायकवाड, सुरज गायकवाड, सागर खोपडे, नितीन गायकवाड यांचा समावेश होता. बंधाऱ्याचे काम नियोजित वेळेत पूर्ण होऊन येत्या काही महिन्यांत शेतकऱ्यांना याचा फायदा होईल, अशी माहिती सरपंचांनी दिली.
बंधाऱ्यामुळे स्थानिक जलस्त्रोत मजबूत होऊन पर्यावरणीय लाभही होणार असल्याचे उपस्थित मान्यवरांनी सांगितले. गावकऱ्यांनी या विकासकामाबद्दल समाधान व्यक्त केले असून पुढील काळात अशीच पायाभूत कामे व्हावीत अशी अपेक्षा त्यांनी व्यक्त केली.
