शिरवळ : शिरवळ येथे पोलिसांनी तडाखेबाज कारवाई करत हनीट्रॅपच्या माध्यमातून एका डॉक्टरकडून तब्बल १ कोटी रुपयांची खंडणी मागणाऱ्या दोघा युवकांना रंगेहाथ पकडले. शिरवळ पोलिसांनी सापळा रचत ही कारवाई केली. या प्रकरणामुळे परिसरात मोठी खळबळ उडाली आहे.
मिळालेल्या माहितीनुसार, एका प्रतिष्ठित डॉक्टरला काही दिवसांपूर्वी एका महिलेच्या माध्यमातून जाळ्यात ओढण्यात आले. या महिलेच्या मदतीने संबंधित युवकांनी डॉक्टरला अडचणीत आणण्याची योजना आखली. त्यानंतर खोट्या आरोपांच्या भीतीने डॉक्टरकडून १ कोटी रुपयांची खंडणी मागण्यात आली.
डॉक्टरने धैर्य दाखवत थेट शिरवळ पोलीस ठाण्यात तक्रार दाखल केली. पोलिसांनी तत्काळ तपास सुरू केला आणि योजनाबद्ध पद्धतीने आरोपींना पकडण्यासाठी सापळा रचला.
फलटण पोलीस उपविभागीय अधिकारी राहुल धस आणि शिरवळ पोलीस ठाण्याचे निरीक्षक यशवंत नलावडे यांच्या मार्गदर्शनाखाली सहाय्यक पोलीस निरीक्षक किर्ती म्हस्के व त्यांच्या पथकाने व्यूहरचना आखून आरोपींना अटक केली.
डॉक्टरकडून खंडणीची रक्कम स्वीकारण्याकरिता दोघेजण ठरलेल्या ठिकाणी आले, तेव्हा आधीच दबा धरून बसलेल्या पोलिसांनी त्यांना रंगेहाथ पकडले. त्यांच्याकडून पुरावेही जप्त करण्यात आले आहेत.
या प्रकरणात आणखी काही आरोपींचा सहभाग असल्याचा पोलिसांना संशय आहे. त्यासाठी चौकशी सुरू असून, हनीट्रॅपसारख्या गुन्ह्यांमध्ये कोणते मोठे रॅकेट कार्यरत आहे का, याचा तपास पोलीस करत आहेत.
