शरद मोहोळ खूनप्रकरणी मोठी अपडेट! विठ्ठल शेलारसह रामदास मारणे पोलिसांच्या ताब्यात, पनवेलच्या फार्महाऊसवर छापे टाकत केली कारवाई

पुणे : पुण्यातील सुतारदरा परिसरात दिवसाढवळ्या झालेल्या शरद मोहोळच्या खुनानंतर (Sharad Mohol Murder Case) मोठी खळबळ उडाली होती. या खुनातील आठ आरोपींना अटक केल्यानंतर आता महत्त्वाची अपडेट समोर येत आहे. पुण्यातील कुख्यात गुंड, गँगस्टर शरद मोहोळ दिवसाढवळ्या झालेल्या खून प्रकरणाला वेगळे वळण मिळण्याची शक्यता आहे. शरद मोहोळ हत्येप्रकरणी मुख्य आरोपी रामदास मारणे उर्फ वाघ्या आणि गुंड विठ्ठल शेलारसह इतर आरोपींना पनवेल पोलिसांनी ताब्यात घेतले आहे.

आतापर्यंत 13 जणांच्या मुसक्या आवळल्या

पनवेल पोलिसांनी सर्व आरोपींना पुणे पोलिसांच्या ताब्यात दिले आहे. शरद मोहोळच्या हत्येचा कट रचण्यात रामदास मारणे उर्फ वाघ्या आणि गुंड विठ्ठल शेलारची मुख्य भूमिका आहे. शरद मोहोळ हत्येप्रकरणी आतापर्यंत पुणे पोलिसांनी 13 जणांच्या मुसक्या आवळल्या आहेत. मोहोळ प्रकरणात रोज नव्या अपडेट समोर येत आहे. शरद मोहोळ हत्येच्या कटातील मुख्य आरोपी रामदास मारणेसह 10 आरोपींना अटक करण्यात नवी मुंबई पोलिसांना यश आले.

तीन मुख्य आणि तीन संशयित आरोपी

अटक करण्यात आलेल्या सहा आरोपींपैकी तीन मुख्य आणि तीन संशयित आरोपी आहे. पनवेल पोलिसांनी पनवेल येथील एका फार्म हाऊसवर कारवाई करीत आरोपींना अटक केली आहे. आरोपींना पुणे पोलिसांच्या ताब्यात दिले आहे.

दहा जणांना पनवेल आणि वाशीमधून अटक
पुणे पोलीसांच्या गुन्हे शाखेने शरद मोहोळ हत्या प्रकरणात दहा जणांना पनवेल आणि वाशीमधून अटक केलीय. विठ्ठल शेलार, रामदास उर्फ वाघ्या मारणे यांसह दहा जणांना गुन्हे शाखेच्या पथकाने छापा टाकून अटक केली आहे. शेलार आणि मारणे यांचा शरद मोहोळच्या हत्येचा कट रचण्यात सहभाग असल्याच तपासात निष्पन्न झाल्यावर ही कारवाई करण्यात आली आहे.

शरद मोहोळच्या हत्येनंतर हे सर्व आरोपी पनवेल आणि वाशी भागात लपून बसले होते. पुणे पोलिसांच्या गुन्हे शाखेने रात्री लपलेल्या ठिकाणी छापा टाकला. यावेळी पनवेल पोलिसांची मदत घेण्यात आली. या सर्व आरोपींना उद्या न्यायालयात हजर करण्यात येणार आहे..

शरद मोहोळ हत्या प्रकरणाला वेगळे वळण मिळण्याची शक्यता
आतापर्यंत मुन्ना पोळेकर हा मुख्य आरोपी असल्याचे मानले जात होते. पोळेकरने इतर साथीदारांसोबत या हत्तेचा कट रचल्याचे प्राथमिक तपासातून समोर आले होते. परंतु, आता शरद मोहोळ प्रकरणात रोज नव्याने नावे समोर येत आहे. रामदास मारणेचे नाव समोर आल्यानंतर वेगळे वळण लागण्याची शक्यता आहे. जमिनीच्या वादातून हत्या झाली आहे.