सातारा : जिल्ह्यातील मांढरदेव श्री क्षेत्र काळूबाई देवीची वार्षिक यात्रा 12 जानेवारी ते 29 जानेवारी 2025 या कालावधीत मोठ्या उत्साहाने व सुरक्षित वातावरणात पार पडणार आहे. यात्रा शांततेत पार पडण्यासाठी जिल्हाधिकारी संतोष पाटील यांच्या अध्यक्षतेखाली एमटीडीसी हॉलमध्ये आढावा बैठक पार पडली. यामध्ये विविध प्रशासन विभागांच्या प्रमुखांनी सहभाग घेतला.
भाविकांसाठी विशेष सुविधा यात्रेदरम्यान लाखोंच्या संख्येने भाविकांची उपस्थिती अपेक्षित असून, दर्शन व गर्दी व्यवस्थापनासाठी देवस्थान ट्रस्टला विशेष जबाबदारी देण्यात आली आहे. यात्रेच्या मुख्य दिवशी भाविकांच्या सुरक्षिततेसाठी ड्रोनच्या साहाय्याने देखरेख केली जाईल. तसेच, 12 ते 14 जानेवारी दरम्यान यात्रेच्या परिसरात “ड्राय डे” घोषित करण्यात आला असून, आजूबाजूच्या गावांमध्येही याची अंमलबजावणी होईल.
सुरक्षा व आरोग्याच्या उपाययोजना यात्रेच्या काळात कोणताही अनुचित प्रकार घडू नये यासाठी प्रशासनाने भरारी पथके तैनात ठेवण्याचा निर्णय घेतला आहे. तसेच, आरोग्य सुविधांसाठी कार्डीयाक ॲम्बुलन्स व डॉक्टरांचे पथक उपलब्ध असेल. भाविकांच्या आरोग्याची काळजी घेण्यासाठी खाजगी रुग्णालयांमध्ये अतिरिक्त बेड राखीव ठेवण्यात येणार आहेत.
वाहतूक व्यवस्थापनाचा विशेष भर राज्य परिवहन विभागाने भाविकांच्या सोयीसाठी विशेष गाड्यांचे नियोजन केले आहे. घाट रस्त्यावर बसेस बंद पडू नयेत यासाठी चांगल्या स्थितीतील वाहने व सक्षम कर्मचारी तैनात असतील. तातडीच्या प्रसंगी वाहन हटवण्यासाठी क्रेनचीही व्यवस्था करण्यात आली आहे.
स्वच्छता व खाद्यपदार्थांची देखरेख अन्न सुरक्षा विभागाने विक्रेत्यांना दर्जेदार खाद्यपदार्थ पुरविण्याच्या सूचना दिल्या असून खराब पदार्थ विक्री टाळण्यासाठी कठोर कारवाईचा इशारा दिला आहे. यात्रेदरम्यान स्वच्छता व वीज पुरवठा अखंडित ठेवण्यासाठी संबंधित विभाग सज्ज आहेत.
जिल्हाधिकारी संतोष पाटील यांनी यात्रेच्या यशस्वी आयोजनासाठी प्रशासन, देवस्थान ट्रस्ट व स्थानिक नागरिकांनी एकत्रित जबाबदारीने काम करण्याचे आवाहन केले.
