शिरवळ, ता. १ मार्च: शिरवळ आणि परिसरातील अवैध धंदे, जुगार अड्डे, मटका, दारू विक्री आणि इतर बेकायदेशीर व्यवहारांवर कडक कारवाई होणार का, की परिस्थिती जैसे थे राहणार, असा प्रश्न नागरिकांना सतावत आहे. नुकतेच शिरवळ पोलीस ठाण्याचे नवे पोलीस निरीक्षक म्हणून यशवंत नलावडे यांनी पदभार स्वीकारला आहे. त्यांच्या कारवाईच्या धडाक्याबाबत नागरिकांमध्ये उत्सुकता असून, अवैध धंद्यांविरोधातील त्यांच्या भूमिकेकडे संपूर्ण परिसराचे लक्ष लागले आहे.
शिरवळ: औद्योगिक वसाहतीत वाढते गुन्हेगारी कृत्य
शिरवळ हे पुणे-बंगलोर महामार्गालगत असलेले महत्त्वाचे ठिकाण आहे. या परिसरात मोठ्या प्रमाणावर औद्योगिक वसाहती विकसित झाल्या असून, त्यामुळे येथे स्थलांतरित कामगार, व्यावसायिक आणि ट्रान्सपोर्ट क्षेत्राशी संबंधित लोकांची मोठ्या प्रमाणावर वर्दळ असते. मात्र, याच वाढत्या लोकसंख्येच्या आधारावर काही असामाजिक प्रवृत्ती सक्रिय झाल्या असून, जुगार, दारू अड्डे आणि इतर अवैध व्यवसायांचा विस्तार वाढला आहे.
स्थानिक नागरिक आणि सामाजिक कार्यकर्त्यांनी वारंवार या अवैध धंद्यांविरोधात आवाज उठवला असला, तरी प्रशासनाच्या कारवाईनंतर काही दिवस शांतता आणि नंतर पुन्हा जैसे थे अशी परिस्थिती दिसून आली आहे. त्यामुळेच यावेळी नलावडे यांच्या कार्यकाळात हा बदल कायमस्वरूपी होईल का, याकडे नागरिकांचे लक्ष आहे.
शिरवळ पोलिसांनी यापूर्वीही वेळोवेळी कारवाया केल्या आहेत. मागील काही वर्षांत स्थानिक पोलीस आणि विशेष पथकांनी संयुक्त मोहिम राबवत अनेक जुगार अड्डे उद्ध्वस्त केले, मोठ्या प्रमाणावर बेकायदेशीर दारू जप्त केली आणि काही संशयितांना अटक केली. मात्र, काही महिने शांततेनंतर हे धंदे पुन्हा सुरू झाल्याची उदाहरणे अनेकदा दिसून आली आहेत.
विशेषतः महामार्गालगत असलेल्या काही ठिकाणी हॉटेल्सच्या आडून अवैध दारू विक्री आणि इतर बेकायदेशीर धंदे सुरू असल्याचे स्थानिक नागरिकांचे म्हणणे आहे. काही स्थानिक लोकांच्या आश्रयामुळे हे व्यवसाय बंद होत नाहीत, अशीही चर्चा आहे. त्यामुळे यावेळी कारवाई मोठ्या प्रमाणावर आणि कायमस्वरूपी होईल का, यावर प्रश्नचिन्ह आहे.
पोलीस निरीक्षक नलावडे यांची भूमिका महत्त्वाची
पोलीस निरीक्षक यशवंत नलावडे यांनी यापूर्वी विविध ठिकाणी प्रभावी कारवाई केल्याची माहिती आहे. त्यांनी पदभार स्वीकारल्यानंतर, स्थानिक नागरिक आणि सामाजिक संघटनांनी त्यांच्याकडे अवैध धंद्यांविरोधात कठोर पावले उचलण्याची मागणी केली आहे. कायदा व सुव्यवस्थेचा भंग करणाऱ्या प्रवृत्तींना कठोर शिक्षा होईल, अशी अपेक्षा आहे.
याशिवाय, केवळ तात्पुरत्या मोहिमा न राबवता या समस्येच्या मुळाशी जाऊन उपाययोजना केल्यासच परिस्थितीत बदल होऊ शकतो. स्थानिक पोलिसांनी अधिक गुप्तचर माहिती संकलित करून, मोठ्या प्रमाणावर छापे मारणे आणि गुन्हेगारांवर कठोर कारवाई करणे गरजेचे आहे.
हा बदल कायमस्वरूपी असेल का?
गेल्या काही वर्षांत अनेक पोलीस अधिकाऱ्यांनी कारवाई केल्या, परंतु त्या काही काळानंतर निष्फळ ठरल्या. त्यामुळे नागरिक आता प्रतीक्षेत आहेत – नलावडे यांच्या कारवाईचा प्रभाव दीर्घकाळ टिकणारा असेल का?
शिरवळकरांच्या सुरक्षेसाठी आणि कायदा-सुव्यवस्था राखण्यासाठी पोलिस प्रशासनाच्या पुढील कृतीकडे संपूर्ण परिसराचे लक्ष आहे. नागरिक आशावादी आहेत की यावेळी हा बदल कायमस्वरूपी घडेल, पण त्यासाठी पोलिसांच्या सातत्यपूर्ण प्रयत्नांची आवश्यकता आहे.
गुटखा विक्रेत्यांवर दोनशे तर दारू विक्रेत्यांवर सातशे पन्नास रुपयांची कारवाई
मिळालेल्या माहितीनुसार,शिरवळ परिसरात अवैध गुटखा विक्री करणाऱ्यांना २०० रुपयांची पावती/ दंड करण्यात आला तर अवैध दारू विक्रेत्यांवर ७५० ते १२५० रुपयांचा मुद्देमाल पकडून त्यांच्यावर कारवाई करण्यात आली . तर विशेष म्हणजे आज पर्यंत जेवढ्या किमतीच्या कारवाई होत होत्या तेवढ्याच आता पण होताना दिसत आहेत यामुळे नागरिक पुन्हा संभ्रमात असून पुढे नक्की काय होईल याकडे लक्ष देऊन आहेत.
क्रमश:
